الغدیر اسپتال ءِ «باز دردناکیں» عکس راست انت

حسین کرمانپور، ءِ تندستی وزارت ءِ رابطه گچی و اطلاع رسانی مرکز ءِ سروک، گوشت آ عکس کہ اجتماعی رسانلاں الغدیر خیراتی اسپتال ءِ نیمگا شنگ بیتگ انت «حقیقت دور نہ انت۔»
آئی اے عکس باز «دردناک» بیان کُرت و گوشت کہ «راست» انت۔ اے عکس تالان کُرتگیں پچانی تہا بندوکیں جنازہ آں تہران ءِ الغدیر اسپتال ءِ نزیکیں کوچگے ءَ پیش دار انت۔
شرق روزنامہ وتی یک راپتے ءَ نوشتگ: «راست دیماہ ۱۴۰۴ ءِ احتجاج ءِ مردہ کُشیں روچانی درگت ءَ، تہران ءِ الغدیر اسپتال ءِ دل لرزوکیں عکسانی شنگ بوئگ ءَ، ایرانی مردمانی جذبہ بار ءِ دگرے ءَ براتگ۔»
شرق روزنامہ ءِ راپت هنگام بلوار و الغدیر میدان ءِ دمگ ءِ هالتا ۱۸ دیماہ ءِ شپ ءَ بیان کنت۔
حسین کرمانپور ءَ شرق روزنامہ ءَ گوشت: «الغدیر میدان ہژدہمی دیماہ ءِ شپ ءِ باز تچک و تگ ءِ جاہاں چہ یکے بیتگ۔ چہ ہمے سوب ءَ بازیں مردمے اے جاہ ءَ چہ نزیکتریں درمان گاہ ءَ رسینتگ انت کہ مکسد الغدیر اسپتال بیتگ۔»
نتیجہ ءَ، «یک کسانیں اسپتالے زخمئی و بیران بیتگیں مردمانی بازیں گونگے ءَ گوں دیم پہ دیم بیتگ۔ مئے کر ءَ رسوکیں راپتانی رد ءَ، نزدیک ۱۵۰ زخمئی اے اسپتال ءَ اتکگ انت و ہمے رنگ ءَ ۳۶ بیران بیتگیں مردمانی لاش ہم ہمے اسپتال ءَ رسینتگ انت۔ اے درگت ءَ الغدیر اسپتال ءِ سردخانہ تہنا پنچ بیران بیتگیں مردمانی گنجایش داشتگ۔ بیران بیتگیں مردم ہم اُود ءَ چہ کہریزک ءَ گوازینتگ بیتگ انت۔»
شرق روزنامہ ءِ راپت اسپتال ءِ ببارہ ءَ شنگ بیتگیں عکسانی تہا چہ ہما عکس ءَ گوشتگ کہ «مردم حتی یک لاش ءِ دیم ہم دیست کن انت: آیدا عقیلی، یک نوک جوانیں جنکّے کہ شاید ہنتا عشق ءِ دیم وتی سینگ ءَ نہ کُرتگ۔ چہ اُمیت و روشنایی ءَ وپسگ گش ئے جہان ہنتا آئی ءِ ساہانی تپش ءَ روان انت۔»